ᐸᐸᑦᑎᔩᑦ ᑲᑎᒪᔨᖏᑦ ᑕᒪᐃᓐᓂ ᐱᖁᔭᖅᑎᒍᑦ ᑲᒪᒋᔭᕆᐊᖃᓲᑦ ᐊᐅᓚᑕᐅᓂᖓᑕ ᐸᐸᑦᑎᕝᕕᐅᔪᑉ, ᑭᓯᐊᓂᓕ ᐸᐸᑦᑎᔩᑦ ᑲᑎᒪᔨᖏᑦ ᑎᓕᓯᓯᒪᕗᑦ ᐸᐸᑦᑎᕝᕕᑉ ᐊᖓᔪᖅᑳᖓᑕ ᐊᐅᓚᑦᑎᔨᒻᒪᕆᖓᑦ ᑕᒪᐃᓐᓂ ᐊᐅᓚᑦᑎᓂᕐᒧᑦ ᖃᓄᐃᓕᐅᕈᑎᖃᖃᑦᑕᕐᓂᐊᕐᓗᓂ ᑕᐃᒪᐃᒋᐊᖃᖅᑎᓪᓗᒍ ᐸᐸᑦᑎᔩᑦ ᑲᑎᒪᔨᖏᑦ ᐱᕚᓪᓕᖁᓪᓗᒋᑦ ᐱᓇᓱᐊᖅᑕᖏᖕᓂᑦ. ᖃᑦᑏᓐᓇᑯᓗᐃᑦ ᐃᖅᑲᓇᐃᔭᖅᑏᑦ ᑎᓴᒪᑦ ᖃᐅᑕᒫᑦ ᐊᐅᓚᑦᑎᓲᑦ ᐸᐸᑦᑎᕕᒻᒥ ᓯᕗᓕᖅᑎᖃᖅᑐᑎᑦ ᐊᖓᔪᖅᑳᖅ ᐊᐅᓚᑦᑎᔨᒻᒪᕆᖕᒥᒃ ᐅᓂᒃᑳᓲᖅ ᐸᐸᑦᑎᔩᑦ ᑲᑎᒪᔨᖏᖕᓄᑦ.
ᐸᐸᑦᑎᔩᑦ ᑲᑎᒪᔨᖏᑦ ᑎᒃᑯᐊᖅᓯᓯᒪᕗᑦ ᐃᓛᒃᑰᖓᔪᒥᒃ ᑮᓇᐅᔭᓕᐅᕋᓱᐊᕐᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᐊᑑᑎᒋᔭᐅᓂᐊᕐᒪᑕ ᖃᐅᔨᒪᔨᕆᔭᐅᓗᑎᑦ ᐊᒻᒪᓗ ᐃᓱᒪᒃᓴᖅᓯᐅᕈᑎᖃᖃᑦᑕᕐᓗᑎᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᔾᔪᑎᓂᑦ ᐸᐸᑦᑎᕕᑉ ᐃᖅᑲᓇᐃᔭᖅᑎᖏᖕᓄᑦ. ᑮᓇᐅᔭᓕᐅᕋᓱᐊᕐᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᐅᑯᓂᖓ ᑲᑎᒪᔨᖃᖅᐳᑦ ᐸᐸᑦᑎᕕᑉ ᐊᖓᔪᖅᑳᖓᑦ ᐊᐅᓚᑦᑎᔨᒻᒪᕆᒃ ᐊᒻᒪᓗ ᑎᓴᒪᑦ ᓯᓚᑖᓃᑦᑐᑦ ᐃᓚᒋᔭᐅᔪᑦ ᑕᒪᐃᓐᓂ ᐃᖅᑲᓇᐃᔮᓖᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᓕᕆᐊᖃᓲᑦ ᑎᒃᑯᐊᖅᑕᐅᑎᓪᓗᒋᑦ ᐊᒻᒪᓗ ᐊᔾᔨᒌᙱᑦᑐᓂᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᔪᙱᑕᒥᓂᒃ ᐃᑲᔫᑎᖃᕈᓐᓇᓲᑦ ᑲᑎᒪᔨᓄᑦ. ᑮᓇᐅᔭᓕᐅᕋᓱᐊᕐᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᐃᓚᒋᔭᐅᔪᑦ ᑎᒃᑯᐊᖅᑕᐅᓲᖑᕗᑦ ᑎᓴᒪᓄᑦ ᐊᕐᕌᒍᓄᑦ ᐊᑯᓂᐅᑎᒋᔪᖅ ᐊᒻᒪᓗ ᑎᒃᑯᐊᖅᑕᐅᒃᑲᓐᓂᕈᓐᓇᓲᑦ ᐊᑕᐅᓯᐊᖅ ᑭᖑᓂᐊᒍᑦ ᑲᑎᒪᔨᐅᒃᑲᓐᓂᕐᓂᐊᕐᓗᑎᑦ ᑎᓴᒪᓄᑦ ᐊᕐᕌᒍᑦ ᐊᑯᓂᐅᑎᒋᔪᖅ. ᑮᓇᐅᔭᓕᐅᕋᓱᐊᕐᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᑲᑎᖃᑦᑕᓲᑦ ᐊᕐᕌᒍᑉ ᐃᓗᐊᓂ ᑎᓴᒪᕋᐃᕋᖅᑎᖅ (ᐅᕝᕙᓘᓐᓃᑦ ᐊᒥᓱᐊᖅᑎᒃᑲᓐᓂᖅ ᑲᑎᒪᔭᕆᐊᖃᓕᕋᐃᒻᒪᑕ), ᐅᓂᒃᑳᓕᐅᓲᑦ ᐸᐸᑦᑎᔨᑉ ᐊᖓᔪᖅᑳᖓᓄᑦ ᐊᐅᓚᑦᑎᔨᒻᒪᕆᒻᒧᑦ, ᐊᒻᒪᓗ ᑲᑎᒪᖃᑎᖃᓲᑦ ᐸᐸᑦᑎᕕᒃᑯᑦ ᑲᑎᒪᔨᖏᖕᓂᑦ ᐊᑕᐅᓯᐊᕐᔪᐊᖅ ᐊᕐᕌᒍᒥ. ᑲᑎᒪᔨᐅᓗᑎᑦ ᖃᓄᐃᓕᐅᕐᓂᐊᕐᓂᕆᓂᐊᖅᑕᖏᑕ ᓇᓗᓇᐃᔭᖅᓯᒪᓂᖏᑦ ᒪᓕᑦᑐᒋᑦ, ᑮᓇᐅᔭᓕᐅᕋᓱᐊᕐᓂᕐᒧᑦ ᐅᖃᐅᔾᔨᒋᐊᖅᑏᑦ ᑲᑎᒪᔨᕋᓛᖏᑦ ᐅᖃᐅᔾᔨᒋᐊᓲᑦ ᐸᐸᑦᑎᕝᕕᒃᑯᑦ ᐃᖅᑲᓇᐃᔭᖅᑎᖏᖕᓄᑦ ᐸᐸᑦᑎᕕᑉ ᖃᓄᖅᑑᕈᑎᖓᑕ ᒥᒃᓵᓄᑦ, ᐱᕙᓪᓕᐊᔪᓕᕆᓂᖅ ᖃᓄᐃᓐᓂᖓᓂᒃ, ᐊᒻᒪᓗ ᑮᓇᐅᔭᓕᐅᕋᓱᐊᓲᑦ ᐃᓕᖅᑯᓯᕆᓲᖏᑦ. ᐋᖅᑭᓱᖅᓯᒪᓂᖏᑦ ᐊᒻᒪᓗ ᐊᑐᓕᖅᑎᑕᐅᓂᖏᑦ, ᐊᒻᒪᓗ ᐅᐊᑦᑎᔭᐅᓂᖏᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᖃᓄᖅᑑᕈᑎ ᑲᒪᒋᔭᕆᐊᖃᓲᕆᕙᖏᑦ ᐸᐸᑦᑎᕕᑉ ᐃᖅᑲᓇᐃᔭᖅᑎᖏᑕ.
ᓯᓚᑖᓃᑦᑐᑦ ᐱᓕᕆᔨᒻᒪᕇᑦ ᐃᖅᑲᓇᐃᔭᖅᑎᑖᕆᔭᐅᓲᑦ ᐃᑲᔪᖅᑎᒋᔭᐅᔭᕆᐊᖃᓕᕋᐃᒻᒪᑕ ᖃᐅᔨᒪᓂᕐᒥᖕᓂᒃ ᖃᐅᔨᓴᕈᓐᓇᕐᓂᐊᕐᒪᑕ ᐸᐸᑦᑎᕝᕕᑉ ᐃᖅᑲᓇᐃᔭᖅᑎᖏᖕᓄᑦ ᐃᓚᖏᖕᓂᑦ ᐸᐸᑦᑎᕕᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᖃᓄᖅᑑᕈᑎᖓ ᐱᓪᓗᒍ.
ᐸᐸᑦᑎᔩᑦ ᑲᑎᒪᔨᖏᑦ ᐊᒻᒪᓗ ᐃᖅᑲᓇᐃᔭᖅᑎᖏᑦ ᐃᑲᔪᖅᑐᖅᑕᐅᒃᑲᓐᓂᓲᖑᒋᕗᑦ ᐊᒥᓱᓄᑦ ᐊᔾᔨᒌᙱᑦᑐᓄᑦ ᖃᓄᐃᓕᐅᕈᑎᒃᓴᖏᖕᓄᑦ ᐸᐸᑦᑎᕝᕕᑉ ᐊᑯᓂᐅᔪᖅ ᐱᖁᔭᖅᑎᒍᑦ ᐅᖃᐅᔾᔨᒋᐊᖅᑎᖏᑦ, ᒐᐅᓕᖕ WLG ᐊᒻᒪᓗ ᑕᒻᒪᖅᓯᒪᔪᕐᓂᐊᖅᑎᓄᑦ ᐊᒻᒪᓗ ᑖᒃᓯᔅᓕᕆᔨᒻᒪᕆᖕᓄᑦ KEMG−ᑯᖕᓂ ᐋᑐᕚᒦᑦᑐᑎᑦ ᑕᒪᒃᑯᐊ.
