ᐸᐸᑦᑎᕝᕕᐅᔫᑉ ᐱᓇᓱᐊᒐᖓᑦ ᒪᓕᑦᑐᒍ ᑕᒪᒃᑮᓐᓂᒃ ᐋᖅᑭᐅᒪᑎᑕᐅᔭᕆᐊᖃᕐᒪᑕ ᐊᒥᐊᒃᑯᖏᑦ ᐱᖁᑏᑦ ᓈᒻᒪᑦᑐᒃᑯᑦ ᐊᑭᓕᐅᑎᒋᔭᐅᓗᑎᑦ ᐊᑦᑐᐃᓂᖃᕐᓂᖏᑦ ᑮᓇᐅᔭᑦ ᐊᑐᖅᑕᐅᓲᑦ ᐅᓪᓗᒥᐅᔪᖅ ᐊᑭᑦᑐᐸᓪᓕᐊᓲᖑᓂᖏᑦ ᖃᑦᑏᓐᓇᕈᕆᐊᓲᖑᓂᓪᓗ 1993−ᒥᓂᑦ ᐊᒻᒪᓗ ᐋᖅᑮᓗᑎᑦ ᐊᕐᕌᒍᑕᒫᑦ ᑮᓇᐅᔭᑦ ᑮᓇᐅᔾᔭᒃᓵᕆᔭᐅᔪᑦ ᐃᓯᖅᐸᓪᓕᐊᓂᖏᑦ ᐸᐸᑦᑎᕕᒃᑯᓐᓃᙶᓲᑦ ᐊᑭᓕᖅᓱᐃᓪᓗᑎᑦ ᐃᑲᔫᓯᐊᖅᑖᓐᓂᐊᖅᑑᓐᓄᒃ ᑲᑐᔾᔨᖃᑎᒌᓐᓄᒃ. ᐊᐅᓚᑦᑎᓂᕐᒧᑦ ᐃᓕᖅᑯᓯᕆᔭᐅᓪᓗᓂ, ᐸᐸᑦᑎᕕᑉ ᑲᑎᒪᔨᖏᑦ ᐊᕐᕌᒍᑕᒫᑦ ᕿᒥᕐᕈᓲᑦ ᖃᐅᔨᓴᖅᑕᐅᓯᒪᓂᖏᑦ ᐸᐸᑦᑎᕕᑉ ᐱᕙᓪᓕᐊᓂᖓ ᑕᒪᒃᑯᓂᖓᒃ ᒪᕐᕉᓐᓂᒃ ᐊᒻᒪᓗ ᐃᓱᒪᒋᔭᖃᕆᐊᖏᓐᓇᓲᑦ ᐱᓇᓱᐊᒐᖏᖕᓂᑦ ᐋᖅᑮᒍᒪᓕᕋᐃᒻᒪᑕ ᑮᓇᐅᔭᓂᑦ ᐱᕈᖅᓴᐃᔾᔪᑎᖃᕐᓂᕐᒧᑦ ᖃᓄᖅᑑᕈᑎᖓᓂᒃ.
ᐸᐸᑦᑎᕕᒃᑯᑦ ᐃᖅᑲᓇᐃᔭᖅᑎᖏᑦ ᐅᐊᑦᑎᖃᑦᑕᓲᑦ ᐱᕙᓪᓕᐊᓂᖏᖕᓂᑦ ᐸᐸᑦᑎᕕᒃᑯᑦ ᐱᖁᑏᑦ ᐱᕈᖅᐸᓪᓕᐊᓂᖏᑦᑕ ᐊᒻᒪᓗ ᐊᔾᔨᒌᙱᓐᓂᖏᖕᓂᒃ ᖃᐅᔨᓴᓲᑦ ᐱᖁᑏᑦ ᐊᑭᖃᕋᔭᕐᓂᖏᑦ ᐱᖁᑏᑦ ᑕᑯᓂᐊᑲᐅᑎᒋᔭᒃᓴᑦ ᒪᓕᑦᑐᒋᑦ ᓈᓴᖅᑕᐅᓯᒪᓂᖏᑦ ᑕᐃᑲᙵᑦ ᐱᔭᐅᓯᒪᔪᑦ ᐱᓇᓱᐊᒐᖓᓂᒃ (“ᐱᓇᓱᐊᒐᕈᑎᒋᔭᐅᔪᑦ ᐱᖁᑎᖏᑦ”) ᐅᖃᐅᑕᐅᓯᒪᓪᓗᑎᑦ ᐸᐸᑦᑎᓂᕐᒧᑦ ᑎᑎᖅᑲᒻᒪᕆᖓᓂᒃ. ᐱᓇᓱᐊᒐᖃᕐᓂᕐᒧᑦ ᐱᖁᑏᑦ ᐊᒥᐊᒃᑯᖏᑦ ᒪᓕᑦᑐᑦ ᐊᒥᓱᕈᖅᐸᓪᓕᐊᓂᖏᑦ ᑖᒃᓰᔭᐃᓚᐅᖅᑎᓪᓗᒋᑦ ᓄᓇᑖᕐᓂᕐᒧᑦ ᐊᑭᓕᐅᑎᒋᔭᐅᓲᑦ ᑕᐃᒃᑯᐊ ᐊᕐᕌᒍᑕᒫᑦ ᑮᓇᐅᔭᑦ ᐊᑐᖅᑕᐅᓲᑦ ᐊᑭᖏᑦ ᓄᓇᕐᔪᐊᕐᒥ ᑮᓇᐅᔭᑦ ᐊᒥᓱᕈᕆᐊᖅᑐᒥᓂᐅᓂᖏᑦ ᐊᒻᒪᓘᓐᓃᑦ ᖃᑦᑏᓐᓇᕈᕆᐊᖅᑐᒥᓂᐅᓂᖏᑦᑕ ᐊᓯᔾᔨᖅᑕᕐᓂᖏᑦ.
ᑮᓇᐅᔭᑦ ᐊᑐᐃᓐᓇᐅᒪᓕᖅᑎᓪᓗᒋᑦ ᐊᒥᓱᕈᕆᐊᖅᑎᑕᐅᔪᑦ ᐊᑭᓕᐅᑕᐅᓂᐊᓕᕐᓗᑎᑦ ᓇᓗᓇᐃᖅᑕᐅᓯᒪᓪᓗᑎᑦ ᑲᓇᑕᒥ ᑖᒃᓯᔅ ᒪᓕᒐᕋᓛᖏᑦ ᐊᑭᓕᐅᑕᐅᓲᖑᕗᑦ ᐊᕐᕌᒍᑕᒫᑦ, ᐸᐸᑦᑎᓂᕐᒧᑦ ᑎᑎᖅᑲᕐᔪᐊᖓᑦ ᑕᐃᒪᐃᖁᔨᓯᒪᓪᓗᓂ, ᐸᐸᑦᑎᕕᒃᑯᑦ ᐱᖁᑎᖏᑦ ᐱᕈᖅᐸᓪᓕᐊᒍᓐᓇᓕᓲᑦ ᒪᓕᑦᑐᒍ ᓄᓇᕐᔪᐊᕐᒥ ᑮᓇᐅᔭᑦ ᐊᑭᖏᑦ ᖃᑦᑎᐅᓂᐊᕐᒪᖔᑕ ᐊᑭᑦᑐᕆᐊᕐᓂᖏᑦ ᐱᕈᖅᑎᑕᐅᒐᓱᐊᕐᓗᑎᑦ ᐱᖁᑏᑦ ᐊᒥᓱᕈᕆᐊᓲᑦ ᐊᓂᒍᖅᐸᓪᓕᐊᑎᓪᓗᒍ ᐊᒻᒪᓗ ᓂᐅᕕᐊᕆᔭᐅᓕᖅᑐᑎᑦ ᖃᑭᒍᑎᒃᓴᓕᐊᕆᔭᐅᓪᓗᑎᑦ. ᑕᒪᒃᑯᐊ ᐱᕈᖅᐸᓪᓕᐊᒍᑎᒋᔭᐅᓲᑦ ᐱᖁᑏᑦ ᐊᑑᑕᐅᑎᑕᐅᓇᓱᐊᖅᑐᑦ ᐊᑭᖏᑦ ᐊᒥᓱᕈᕆᐊᕐᓗᑎᑦ ᐊᓂᒍᖅᐸᓪᓕᐊᑎᓪᓗᒍ ᐊᕐᕌᒍᑕᒫᑦ ᑮᓇᐅᔭᓪᓚᑦᑖ ᑮᓇᐅᔾᔭᒃᓵᕆᔭᐅᙱᖔᖅᑐᑎᑦ. ᑮᓇᐅᔭᑦ ᑮᓇᐅᔾᔭᒃᓵᕆᔭᐅᓂᕋᖅᑕᐅᓕᓲᑦ ᐸᐸᑦᑎᕕᒃᑯᑦ ᐊᑭᓕᐅᑎᒋᔭᒥᓂᕆᒍᓂᒋᑦ, ᐃᒪᓐᓇᐸᓘᓲᖑᓪᓗᑎᑦ 4% ᐊᑭᓕᐅᑎᖏᑦᑕ ᐊᒥᓲᓂᖏᑦ, ᐊᒻᒪᓗ ᐊᒥᓲᓛᖏᑦ ᐸᐸᑦᑎᕕᒃᑯᑦ ᐊᑭᓕᐅᑎᒋᓂᐊᖅᑕᖏᑦ ᑮᓇᐅᔭᖅᑖᕐᓂᐊᖅᑑᓐᓄᒃ ᑲᑐᔾᔨᖃᑎᒌᖕᓄᒃ ᐊᐅᓚᑦᑎᒍᓐᓇᐅᑎᖃᖁᓪᓗᒋᑦ ᑮᓇᐅᔭᓂᑦ ᑮᓇᐅᔭᖅᑐᕈᑎᒃᓴᖃᕐᓂᐊᕋᒥᒃ. ᐊᓯᔾᔨᖅᑕᓗᐊᙱᑦᑐᒥᒃ, ᐊᓯᐅᔨᔭᐅᓂᐊᙱᑦᑐᓂᑦ, ᓱᒃᑲᐃᑦᑐᒥᒃ ᐊᒥᓱᕈᕆᐊᖅᑕᐅᓪᓗᑎᑦ ᐊᑭᓕᐅᑕᐅᓂᖏᑦ ᐱᒻᒪᕆᐅᓘᕗᑦ ᐸᐸᑦᑎᕕᒃᑯᓐᓄᑦ.
ᑮᓇᐅᔭᓕᐅᕋᓱᐊᕐᓂᕐᒧᑦ ᓄᓇᕐᔪᐊᕐᒥ ᑮᓇᐅᔭᑦ ᐊᑐᖅᑕᐅᓲᑦ ᐊᕐᕌᒍᑕᒫᑦ ᐊᑭᓕᖅᓱᐃᔾᔪᑎᖏᑦ ᐊᒥᒐᖅᓯᓂᐊᖅᑐᒥᓂᐅᑎᓪᓗᒋᑦ ᐅᓪᓗᒥᐅᔪᖅ 4% ᐊᑭᓕᐅᑕᐅᓲᑦ ᐊᒥᓲᓂᖏᑦ, ᐃᓱᒪᒋᓪᓗᒍ ᐃᑲᔫᓯᐊᖅᑖᕐᓂᐊᖅᑑᒃ ᑲᑐᔾᔨᖃᑎᒌᒃ ᑕᒪᐃᓐᓂ ᐱᓐᓂᕈᑎᑦ 4%-ᖑᔪᒥᒃ, ᐊᒥᒐᖅᓯᓂᖏᑦ ᓯᕗᓂᐊᒍᑦ ᐊᑭᓕᐅᑕᐅᓲᖑᕗᑦ ᐃᑲᔫᓯᐊᖅᑖᕐᓂᐊᖅᑑᓐᓄᒃ ᑲᑐᔾᔨᖃᑎᒌᓐᓄᒃ ᐊᑭᑐᔪᑦ ᐊᑐᖅᑐᐊᕈᑎᐅᓂᕋᖅᑕᐅᓪᓗᑎᑦ. ᑕᐃᒪᐃᑦᑎᓪᓗᒋᑦ ᖃᐅᔨᒪᓇᑦᑎᐊᕈᑎᒋᔭᐅᓲᖑᕗᖅ ᐃᑲᔫᓯᐊᖅᑖᕐᓂᐊᖅᑑᒃ ᑲᑐᔾᔨᖃᑎᒌᒃ ᐊᓯᔾᔨᖅᓯᒪᙱᑦᑐᒥᒃ ᐊᒥᓱᓂᑦ ᑮᓇᐅᔭᖃᐃᓐᓇᕐᓂᐊᕋᒥᒃ ᐊᕐᕌᒍᑕᒫᑦ. ᐊᑭᑐᔪᑦ ᐊᑐᖅᑐᐊᒐᒃᓴᑦ ᐊᒥᐊᒃᑯᖏᖕᓄᑦ ᐊᒃᓱᕈᕈᑎᒋᔭᐅᓂᖅᓴᐅᓲᖒᖕᒪᑦ ᐸᐸᑦᑎᕕᐅᔪᒧᑦ ᐱᓇᓱᐊᒐᖓᓂᒃ ᑎᑭᑦᑎᓗᑎᑦ ᐱᖁᑏᑦ ᐊᒥᓲᓂᖏᑦ ᐊᑐᕆᐊᖃᓲᖏᖕᓂᑦ ᑕᒪᒃᑯᐊ ᐱᖁᑏᑦ ᐸᐸᑦᑎᕕᒃᑯᑦ ᑮᓇᐅᔾᔭᒃᓵᕆᙱᒻᒪᒋᑦ ᐸᐸᑦᑎᕕᒃᑯᑦ ᑮᓇᐅᔭᖅᑖᕈᑎᒋᓗᓂᒋᑦ.
ᐅᖓᑕᐅᔨᓯᒪᔪᑦ ᐱᕈᖅᓴᔭᒥᓃᑦ ᐊᑭᓕᐅᑎᒋᔭᐅᓲᖑᕗᑦ ᐊᑑᑕᐅᑦᑎᐊᖅᑐᑑᕗᑦ ᐊᑭᑐᔪᓄᑦ ᐊᑐᖅᑐᐊᖅᑕᒥᓃᑦ ᐊᑭᓕᖅᑕᐅᖁᓪᓗᒋᑦ ᐊᒻᒪᓗ ᐊᑭᓕᐅᑎᖃᕐᕕᒃᓴᐅᔪᑑᓪᓗᑎᓪᓗ ᐅᖓᑕᐅᔨᔪᒥᓂᐅᒍᑎᑦ 4%−ᖑᔪᖅ ᐊᒥᓲᓂᖏᑦ ᓯᕗᓂᒃᓴᒥ ᐱᔭᐅᓛᕐᓂᖏᑦ ᑐᙵᕕᖃᕐᒪᑕ ᓯᕗᓂᒃᓴᒥ ᑮᓇᐅᔭᓂᑦ ᐱᕈᖅᓴᐃᒍᓐᓇᕐᓂᖏᖕᓂᑦ ᐊᒻᒪᓗ ᓄᓇᕐᔪᐊᕐᒥ ᑮᓇᐅᔭᓕᐅᕈᑎᖃᕐᓂᕐᒨᖓᔪᑦ ᖃᓄᐃᑦᑑᒐᔭᕐᓂᖏᖕᓂᑦ, ᓇᓪᓕᐊᓪᓘᓐᓃᒃ ᑖᒃᑯᐊ ᑕᑎᒋᔭᒃᓴᐅᙱᑦᑐᑦ ᐸᐸᑦᑎᕕᐅᔪᑉ ᐊᑭᓕᐅᑎᒋᒋᐊᖃᕋᔭᖅᑕᖏᖕᓄᑦ ᓇᓚᐅᑦᑖᕋᒃᓴᐅᙱᓐᓂᖏᖕᓄᑦ.
ᐱᒋᐊᓕᓵᖅᑎᓪᓗᒍ ᐸᐸᑦᑎᕕᒃ, ᐱᖁᑎᖃᙱᓗᐊᓚᐅᕐᒪᑕ ᐸᐸᑦᑎᕕᑉ ᐃᓗᐊᓂ ᐃᑲᔪᖅᑐᐃᖁᓪᓗᒋᑦ ᐊᐅᓚᑦᑎᒍᓐᓇᕐᓂᕐᒧᑦ ᐊᑐᖅᑕᐅᔭᕆᐊᓖᑦ ᐃᑲᔫᓯᐊᖅᑖᕋᔭᖅᑑᒃ ᑲᑐᔾᔨᖃᑎᒌᖑᔫᒃ ᐊᒻᒪᓗ ᐊᑑᑎᖃᑦᑎᐊᕋᒃᓴᒥᒃ ᐊᑭᑐᔫᑎᓂᑦ ᐊᑐᖅᑐᐊᕈᑎᓂᑦ ᐊᑭᓕᒃᓴᖃᓕᓚᐅᖅᓯᒪᕗᖅ. 2012-ᒥᓂᑦ ᐸᐸᑦᑎᕕᐅᔪᖅ ᓴᙱᔪᒥᒃ ᑮᓇᐅᔭᓕᐅᕈᓐᓇᖅᓯᒪᓂᖃᖅᐳᑦ ᐊᒻᒪᓗ ᐊᑐᓕᖅᑎᑎᓪᓗᑎᑦ ᓄᑖᕐᒥᒃ ᑮᓇᐅᔭᓕᐅᕐᓂᕐᒧᑦ ᖃᓄᖅᑑᕈᑎᒥᒃ ᐊᓯᔾᔩᓗᐊᕌᓗᒃᓯᒪᓂᐊᙱᒻᒪᑕ ᐅᑎᖅᑎᑦᑎᕕᐅᓂᖏᑦ ᐊᒻᒪᓗ ᐊᕐᕌᒍᑕᒫᑦ ᑮᓇᐅᔭᖅᑖᕆᒋᐊᓕᖏᑕ ᐊᒥᓲᓂᖏᖕᓂᑦ ᐱᔪᓐᓇᖃᑦᑕᖅᓯᒪᕗᑦ ᑮᓇᐅᔭᑦ ᐊᓂᕙᓪᓕᐊᔪᑦ ᐃᓇᖏᖅᑕᐅᑲᐅᑎᒋᖃᑦᑕᕐᓂᐊᕐᒪᑕ. ᑕᒪᒃᑯᐊ ᐱᔾᔪᑏᑦ ᐸᐸᑦᑎᕕᒻᒥᒃ ᐊᑭᓕᐅᑎᖃᕈᓐᓇᖅᑎᑦᑎᓯᒪᔪᑦ ᐅᖓᑖᓂ 4% ᐊᒥᓲᓂᖏᖕᓂᑦ ᐊᕐᕌᒍᒐᓴᐅᓕᖅᑐᓂᑦ 2012-ᖑᔪᒻᒪᓂᑦ ᐊᒻᒪᓗ ᑕᐃᒪᐃᒻᒪᑦ ᐊᑭᓕᖅᓱᐃᒃᑲᓐᓂᕈᓐᓇᖅᓯᒪᓕᖅᑐᑎᑦ ᐊᑭᑐᔫᑏᑦ ᐊᑐᖅᑐᐊᕈᑎᓂᑦ. ᑕᒪᒃᑯᐊᓕᒫᑦ ᐊᑭᑐᔫᑏᑦ ᐊᑐᖅᑐᐊᖅᑕᐅᓂᖏᑦ ᐊᑭᓕᕇᖅᑕᐅᓯᒪᓕᖅᑐᑦ ᐃᓱᓕᑦᑎᑎᓪᓗᒍ 2018 ᑖᒃᑯᑎᒎᓇᖅ ᐊᔾᔨᒌᙱᑦᑐᑎᒍᑦ ᐃᑲᔫᓯᐊᖅᑖᖃᑦᑕᕆᐊᓖᒃ ᑲᑐᔾᔨᖃᑎᒌᒃ ᐱᔪᓐᓇᖅᓯᒪᓕᖅᑐᑎᒃ ᑐᖔᓂ 4%−ᖑᔪᓂᑦ ᐊᑭᓕᐅᑕᐅᔪᒃᓴᒫᑦ ᐊᒥᓲᓂᖏᖕᓂᑦ ᐊᒻᒪᓗ ᐸᐸᑦᑎᕕᒃ ᑮᓇᐅᔭᒃᑲᓐᓂᒻᒪᕆᖕᓂᒃ ᐱᔪᓐᓇᖃᑦᑕᖅᓯᒪᓕᖅᑐᓂ.
ᑕᒪᒃᑯᐊ ᐱᖁᑏᑦ ᐸᐸᑦᑎᕕᒻᒨᖅᑕᐅᑎᓪᓗᒋᑦ ᐅᐊᑦᑎᐊᕈ ᐊᕝᕕᐊᕈᑎᒥᓂᕐᓂᒃ ᐊᑐᖅᑕᐅᕙᓚᐅᖅᓯᒪᔪᒥᒃ ᐊᑐᕈᓐᓃᑏᑦᑎᓂᖃᖅᐳᖅ ᐸᐸᑦᑎᕕᐅᔪᖅ ᐱᕚᓪᓕᕐᓂᐊᕐᒪᑕ ᐱᓇᓱᐊᒐᕐᒥᖕᓂᒃ. ᓯᕗᒧᐊᓪᓗᓂ ᐱᒻᒪᕆᐅᕗᖅ ᐸᐸᑦᑎᕕᑉ ᑮᓇᐅᔭᓕᐅᕋᓱᐊᕐᓂᕐᒧᑦ ᖃᓄᖅᑑᕈᑎᖓᓂᒃ ᐊᑭᑐᔫᑎᓄᑦ ᐊᑐᖅᑐᐊᖅᑕᐃᓕᑎᑦᑎᓲᖑᓪᓗᓂᓗ ᐊᑯᓂᐅᔪᒧᑦ. 2013-ᒥᓂᑦ ᐸᐸᑦᑎᕕᒃ ᓄᐊᒃᓯᒪᔪᓂᑦ ᓈᒻᒪᑦᑐᓂᑦ ᐱᖁᑎᖃᖅᓯᒪᔪᑦ ᐱᓇᓱᐊᒐᖏᑦ ᐱᔭᕇᖅᑕᐅᒍᓐᓇᖁᓪᓗᒋᑦ ᓈᒻᒪᑦᑐᒃᑯᑦ ᓴᓂᕐᕙᐃᓯᒪᖁᓪᓗᒋᑦ ᓯᕗᓂᒃᓴᒥ ᑮᓇᐅᔭᓕᐅᕋᓱᐊᕐᓂᕐᒧᑦ ᐊᒃᓱᕈᕈᑕᐅᔪᓄᑦ ᐊᑑᑕᐅᔪᓐᓇᖃᑦᑕᕋᔭᕐᒪᑕ ᐊᒻᒪᓗ ᓈᒻᒪᑦᑐᓂᑦ ᐊᕐᕌᒍᑕᒫᑦ ᑮᓇᐅᔭᖅᑖᓲᑦ ᐊᑭᓕᐅᑎᖃᖁᓪᓗᒋᑦ ᐊᒻᒪᓗ ᓱᒃᑲᐃᑦᑑᒐᓗᐊᕐᒥᒃ ᐊᒥᓱᕈᕆᐊᖅᑕᐅᖁᓪᓗᒋᑦ 4% ᐊᑭᓕᐅᑎᒋᓲᖏᑦ ᐊᒥᓲᓂᖏᑦᑕ. ᓈᒻᒪᑦᑐᓂᑦ ᐱᖁᑎᖃᖁᓪᓗᒋᑦ ᐸᐸᑦᑎᕕᖕᒥ, ᖃᐅᔨᓴᖅᑕᐅᑦᑎᐊᖅᓯᒪᔪᒥᒃ ᖃᓄᖅᑑᕈᑎᖃᕈᑎᑦ ᐊᒻᒪᓗ ᓴᙱᔪᒥᒃ ᐊᐅᓚᑦᑎᒍᓯᖃᕈᑎᑦ, ᐸᐸᑦᑎᔨᒃᑯᑦ ᑲᑎᒪᔨᖏᑦ ᐱᓇᓱᐊᒐᕐᒥᖕᓂᒃ ᑎᑭᑦᑐᒍᓐᓇᖃᑦᑕᓂᐊᖅᑐᑦ ᐃᑲᔪᓲᖑᓪᓗᓂᓗ ᑕᒪᓐᓇ ᑮᓇᐅᔭᖃᖅᑎᑕᐅᓗᑎᑦ ᐱᓕᕆᐊᖏᖕᓂᑦ ᑖᒃᑯᓄᖓ ᐃᑲᔫᑎᖃᖁᓪᓗᒋᑦ ᐃᑲᔫᓯᐊᖅᑖᐸᑦᑑᓐᓄᒃ ᑲᑐᔾᔨᖃᑎᒌᓄᒃ.
