ᐱᐅᔪᒃᑯᑦ ᐊᐅᓚᑦᑎᔭᕆᐊᖃᕐᓂᖏᑦᑕ ᒪᓕᑦᑕᐅᓲᑦ ᑮᓇᐅᔭᓕᐅᕋᓱᐊᖃᑦᑕᓲᓂᑦ, ᐸᐸᑦᑎᔨᐅᔪᑦ ᐊᔪᙱᒋᐊᓖᑦ ᖃᐅᔨᒪᓂᖃᕐᓗᑎᓪᓗ ᑐᑭᓯᔪᓐᓇᖁᓪᓗᒋᑦ ᑮᓇᐅᔭᓕᐅᕋᓱᐊᕐᓂᕐᒥᒃ, ᐱᕙᓪᓕᐊᔪᓕᕆᓂᕐᒥᒃ ᑮᓇᐅᔭᓕᐅᕋᓱᐊᕐᓂᕐᒥᒃ, ᓇᖕᒥᓂᖁᑎᒥᒃ ᐊᐅᓚᑦᑎᔨᓂᕐᒥᒃ, ᐊᒻᒪᓗ ᑮᓇᐅᔭᓕᕆᓂᑎᒍᑦ ᐊᐅᓚᑦᑎᓂᕐᒥᒃ ᐊᒻᒪᓗ ᖃᓄᖅ ᑕᒪᒃᑯᐊ ᐱᔾᔪᑏᑦ ᐊᑦᑐᐃᓂᖃᕈᓐᓇᕐᒪᖔᑕ ᐸᐸᑦᑎᔨᐅᔪᑉ ᐱᕚᓪᓕᖁᓪᓗᒋᑦ ᐱᓇᓱᐊᒐᖏᖕᓂᒃ. ᑕᒪᒃᑯᐊ ᖃᐅᔨᒪᓂᕆᔭᕆᐊᓕᖏᑦ ᐊᔪᙱᓐᓂᕆᒋᐊᓕᖏᓪᓗ, ᖄᖓᒍᒃᑲᓐᓂᖅ ᑲᒪᒋᔭᕆᐊᖃᕐᓂᖏᑦ ᐸᐸᑦᑎᓗᑎᑦ ᐊᒻᒪᓗ ᐱᕈᖅᓴᐃᓗᑎᑦ ᓄᓇᑖᕐᓂᕐᒧᑦ ᐊᑭᓕᐅᑎᒃᓴᓂᑦ ᓯᕗᓂᒃᓴᓕᒫᖏᑕ ᑕᒪᐃᓐᓂ ᓯᕗᕚᕆᔭᐅᔪᑦ ᓄᓇᕗᒻᒥᐅᑦ ᐃᓄᐃᑦ, ᑐᑭᓕᒃ ᐱᓕᕆᐊᒃᓴᖏᑦ ᓄᓇᕗᒻᒥ ᐸᐸᑦᑎᕝᕕᐅᔪᑉ ᐸᐸᑦᑎᔨᖏᑦ ᐊᒃᓱᕈᕐᓇᖅᑑᕗᖅ ᐊᒻᒪᓗ ᐱᕚᓪᓕᖅᑐᕐᔫᔮᖅᑎᑦᑎᒍᑕᐅᔪᓐᓇᖅᑐᓂ. ᐃᓄᐃᑦ ᐱᔨᑦᑎᕋᖅᑐᑦ ᐸᐸᑦᑎᔨᐅᖃᑕᐅᓪᓗᑎᑦ ᐅᖁᒪᐃᑦᑐᒥᒃ ᐊᔾᔭᖅᓯᓲᑦ ᑭᓯᐊᓂᓕ ᐱᕚᓪᓕᔨᖅᓯᒪᔭᖏᖕᓂᒃ ᐱᒃᑯᒋᑦᑎᐊᖅᑐᑎᑦ ᐸᐸᑦᑎᔨᒃᑯᑦ ᖃᓄᐃᓕᐅᖅᐸᓪᓕᐊᓂᖏᖕᓂᒃ ᐱᕙᓪᓕᐊᓂᖃᖅᑎᑕᐅᓪᓗᑎᑦ.
ᐸᐸᑦᑎᔩᑦ ᒪᓕᓲᑦ ᐃᓕᖅᑯᓯᕆᒋᐊᖃᖅᑕᐅᔪᓂᑦ ᐸᐸᑦᑎᔨᐅᓪᓗᑎᑦ ᑕᒪᒃᑯᐊᓗ ᐱᑐᐃᓐᓇᐅᑎᑕᐅᕙᙱᓚᑦ ᖃᓄᐃᓕᐅᕆᐊᖃᕐᓂᖏᑦ ᑲᒪᒋᔭᒥᓂᒃ ᑲᒪᑎᓪᓗᒋᑦ ᐊᒻᒪᓗ ᐱᕚᓪᓕᕆᐊᓕᖏᑦ ᐸᐸᑦᑎᕝᕕᐅᔪᑉ ᐱᓇᓱᐊᒐᖓᑕ ᐱᕚᓪᓕᖅᑕᐅᖅᑳᕆᐊᓖᑦ ᑕᒪᐃᓐᓂ ᐊᓯᖏᖕᓂᒃ ᐃᓱᒪᒃᓴᖅᓯᐅᕈᑎᖃᓚᐅᙱᒻᒪᕆᑦᑎᓪᓗᒋᑦ. ᐊᑐᓂ ᑲᑎᒪᔨᐅᔪᑦ ᑲᒪᒋᔭᖃᓲᖅ ᑕᒪᐃᓐᓂ ᑭᒡᒐᖅᑐᐃᓪᓗᑎᑦ ᓄᓇᕗᒻᒥᐅᑦ ᐃᓄᐃᑦ ᐃᓅᕙᓚᐅᖅᓯᒪᔪᑦ, ᐅᓪᓗᒥ ᐆᒪᔪᑦ, ᐊᒻᒪᓗ ᓯᕗᕚᒃᓴᖏᑦ ᑲᒪᒋᔭᖃᖅᑎᓪᓗᒋᑦ ᑲᒪᒋᔭᕆᐊᓕᒻᒥᖕᓂᒃ, ᑕᐃᒃᑯᑑᙱᑦᑐᖅ ᐊᕕᑦᑐᖅᓯᒪᔪᓃᙶᖅᓯᒪᔪᑦ ᑎᒃᑯᐊᖅᓯᒪᔪᒥᓃᑦ ᑭᒡᒐᖅᑐᑐᐃᓐᓇᙱᓪᓗᒋᑦ.
ᐊᑐᓂ ᐱᖓᓱᑦ ᐊᕕᑦᑐᖅᓯᒪᔪᓂᑦ ᐃᓄᐃᑦ ᑲᑐᔾᔨᖃᑎᒌᖏᑦ ᓄᓇᕗᒻᒥ ᑎᒃᑯᐊᖅᓯᓲᑦ ᑲᑎᒪᔩᓐᓂᒃ ᒪᕐᕉᖕᓂᒃ ᐸᐸᑦᑎᕕᐅᔪᒧᑦ ᑲᑎᒪᔨᐅᖃᑕᐅᓂᐊᕋᒥᒃ ᐱᖓᓱᓄᑦ ᐊᕐᕌᒍᓄᑦ ᐊᑯᓂᐅᑎᒋᔪᖅ. ᑲᑎᒪᔨᖏᑦ ᐸᐸᑦᑎᔨᒃᑯᑦ ᑎᒃᑯᐊᖅᑕᐅᒃᑲᓐᓂᕈᓐᓇᓲᑦ ᐃᓱᓕᑦᑎᒐᐃᒻᒪᑕ ᐊᑯᓂᐅᓂᖏᑦ ᑲᑎᒪᔨᐅᓂᖏᑦᑕ. ᑲᑎᒪᔨᐅᔪᑦ ᐸᐸᑦᑎᔨᒃᑯᓐᓄᑦ ᑕᐃᒃᑯᐊ ᑎᒃᑯᐊᖅᓯᓲᑦ ᐃᒃᓯᕙᐅᑕᒃᓴᒥᖕᓂᒃ ᐊᒻᒪᓗ ᐃᒃᓯᕙᐅᑕᑉ ᑐᖏᓕᐊᓂᒃ ᑕᐃᑲᙵᑦ ᐅᓪᓗᒥᐅᔪᖅ ᑲᑎᒪᔨᐅᔪᓂᑦ ᐸᐸᑦᑎᔨᒃᑯᓐᓄᑦ. ᐅᓪᓗᒥᐅᔪᖅ ᑲᑎᒪᔨᖏᑦ ᐸᐸᑦᑎᔨᒃᑯᑦ ᑲᑎᒪᔨᐅᖃᑕᐅᔪᑦ ᐅᑯᐊᖑᕗᖅ:
